MUHCS rate ang ni lovin Synod Hospital rate angin sorkar kal; hleih nei takin ZPM sorkarin ro a rel- AAP

by Editor

Tualchhung News

ZORAM TODAY| 1st October, 2025: Amm Aadmi Party, Mizoram chuan vawiin khan thuchhuah siamin, April ni 1, 2025 atanga hman tan Mizoram Universal Health Care Scheme (MUHCS), man chawi lova damlo inenkawlna (cashless system) chungchang an tarlang a.

AAP chuan MUHCS hi tha kan ti em em a, Mizoram mipui zawng zawng te'n kan hman tangkai vek theih nan leh damdawiin zawng zawng te'n an zawma scheme hlawhtling tak a lo nih theih nan April ni 30, 2025 pawh khan kan Governor chu a chenna inah hmu in kan lo sawipui tawh a, keini AAP te chu mipui hriselna turin theihtawp chhuah kan inhuam reng zel dawn a ni, an ti a.

Mizoram chhunga damdawiin tam zawkin an zawm thei ta hi kan lawm tak zet zet a, a la zawm ve lo damdawiin te pawhin mipui hmakhua ngaia zawm turin kan ngen nawn leh vek bawk a ni, tih an tarlang.

September ni 25 leh 26 Synod Executive Committee (SEC) thukhawm in MUHCS hnuaia Synod Hospital, Aizawl leh John Williams Hospital, Lunglei ten a zawm ve thei tawh tura thutlukna a siam leh ta zel pawh hi a lawmawm kan ti, an ti a.

"Amaherawhchu, he an inremnaah hian MUHCS package rate ang ni lova Synod Hospital te rate ang zawka zawm an remti bik hi tha lo kan ti hle a, hetiang anga keini Democracy rama hleih nei taka rorel ZPM party kaihhruai sorkar hi na takin kan dem a ni," an ti.

AAP chuan, "Sorkar hian MUHCS zawm ve dang damdawiin te anga a package rate pangngai a hmang dawn lo a nih chuan Synod damdawiinte pawh hi an package rate hman sak bik suh se tih hi kan duh dan a ni a, rualkhai taka rorel tur in ZPM kaihhruai sorkar hi kal tawh se kan ti," an ti.

AAP chuan, "2023 inthlanpui a ZPM manifesto bu Sustainable Development and Reform Policy (SDRP), chapter VII, point (f) a an intiam ang a , MUHCS inziahluh theih hun hi engtiklai pawha hawng reng turin kan ngen nawn leh bawk a ni," tih an tarlang.

( Zoram Today Facebook page, X leh Instagram te khawngaihin min lo follow ve ta che.)